青心直說 - 胡孟青 2010年3月19日

青心直說 - 胡孟青 2010年3月19日分享至 Facebook
青心直說：喝退央企禁不了炒風 2010年03月19日
又一個政策風險的例子，國資委突然勒令 78間央企完成手頭項目後，要退出房產市場，矛頭直指剛喺北京天價投地嘅央企，其中中國人壽(2628)入股成為大股東嘅遠洋地產(3377)成眾矢之的。到底會唔會被禁目前仲未知，一旦成真，股東講唔定會好似雷曼苦主咁上街示威。

兩會一開完，北京隔日就拍出 3幅地王，連九唔搭八嘅中國兵器裝備都加入爭地，真係冇有識死。中央台報道，深圳一啲經濟適用房，停車場停滿寶馬同奔馳，擺明有人騙福利。有錢人住公屋炒樓，央企就用公款買地，難怪 SOHO中國(410)老闆潘石屹鬧央企與民爭利。

社會不公，樓價飛升已成計時炸彈，國資委企圖平息民憤高調出招。但呢啲央企嘅市場份額其實唔多，去年央企嘅房地產銷售只佔全國商品房 5%，銷售面積只佔全國 3%。而獲豁免、以房地產為主業嘅 16間央企，規模已佔整體央企 85%，即使打壓 78間央企唔准再搞房地產，都只係得全國 3%入面嘅 15%，影響唔大。

轉移視線息民憤
大家唔好俾國資委轉移視線，地權一向由地方政府控制，賣邊度、點樣賣、起乜樓，全由政府掌握，亦係主要收入來源。呢次禁嘅公司數量係多，但影響力細，頂多可以減少佢哋無厘頭天價買地嘅羊群效應，對解決供求失衡根本冇幫助。城市化係趨勢，炒樓亦係內地嘅主要投資渠道，兩者都增加對樓宇需求。政府唔增加土地供應，發展商囤地，製造供應少嘅假象其實係人禍。

未經歷過八萬五嘅內地民眾，買樓係人生頭號目標。長遠要解決樓價問題，不能只壓炒風，不如諗吓點改善經濟結構過份集中喺幾個大城市。中央應全速推進戶籍制及土地改革、增加投資渠道、加強反貪阻截挪用公費炒股炒樓。短線要減買樓需求，甚至可以「租金下鄉」，提供補貼幫年輕人解決住屋問題。香港好多小康嘅上一代，就係靠住廉租屋至可以儲第一桶金，送仔女留學甚至買樓脫貧。

胡孟青

Top Index