金融High Tea 2010年3月23日

金融High Tea 2010年3月23日分享至 Facebook
金融High Tea——港股跌市跑前頭
2010年3月23日
如果要用兩個字來形容港股昨日的走勢，「樣衰」兩個字就最貼切，恒指接連跌穿10天及20天移動平均線，個圖就好似細佬仔由滑梯滑落嚟咁，恒指收市大跌438點，收20933點。

昨天早上期指開市跌200幾點時，經紀張又打電話來，話港股「無理由」跌200幾點咁多，佢話杜指上周五都係跌37點，日本又無市，內地股市亦企穩，所以港股「無理由」跌咁多，我提醒佢指數的存在就是理由，你愈唔信佢跌，佢愈跌俾你睇。

月尾插低轉好倉
港股跌咁多，表面上由印度突然提早加息四分一厘觸發，令人關注中國可能都好快要加息，不過妙就妙在昨日港股大插，但內地市無插喎，上證綜指收報3074點，上漲6點，內地市都唔驚，香港股市又跌咁多，豈不是皇帝不急太監急？

真相可能係咁，內地並非開放市場，所以股市唔一定跟環球走勢，但港股就要跟老外的運作邏輯啦，我估港股咁跌，可能係一種「跑前頭效應」，美股連升咁多日，相對強弱指數(RSI)去到76，加上上周五係美國四種期貨期權結算日，結算完之後，都係時候要調整吓啦，你知炒港股的大行，同炒美股係同一班人，既然明知美股要回吓，咁就唔好客氣，先行插埋港股，你做咗好倉想走都係咁易。

中環茶友仲送多一個陰謀論，話過去半年到月尾好多時個市都會跌，佢估外資大戶做咗期指好倉，本來到月尾要轉倉，不排除佢地到中後段已經平了即月好倉，到月尾插低啲，咁下月開好倉的成本又減低，如果每個月轉好倉的成本都少600點至1000點，喺一年落嚟條數好襟計，所以你做好倉想坐到月尾，難矣。

資金續流入香港
港股本周將進入「超級業績周」，多隻中資重磅股，包括中石油(857)、中行(3988)將公佈業績。有基金經理表示，2009年業績變幅不重要，因為不少內地重磅股，尤其是內銀股早前已發表盈喜，市場最關注是管理層如何指引今、明年發展及策略，「經過09年反彈後，今年面對的挑戰更大。」所以唔好預計大公司出業績對大市有好大刺激。

話得說回來，即使未來一星期有啲調整，若睇中線，又唔好睇得太淡，因為仍有資金流入香港。據野村資金報告顯示，不少資金開始流入港股基金。截至上周三(3月17日)的一周，港股基金吸資5.85億美元，是連續兩周成為全亞洲吸資之冠。中國股票基金就唔係好得，上周只吸資8500萬美元。野村指出，此次吸資剛好抵銷之前的走資浪，同樣情況亦出現於其他地區基金。

中電信(728)昨日公佈09年度業績，錄得純利144億元，按年增長15.3倍，每股盈利18仙；經營收入2094億元，升12.2%，末期息維持8.5港仙。中電信董事長兼首席執行官王曉初預期，今年度盈利將回升，並預計今年度資本開支為390億元，較09年微升2.5%。今年度手機補貼佔移動收入比例將低於去年度的33.6%，惟補貼金額將逾100億人民幣，高於去年，原因是移動收入比例會大幅增長。中電信2月份本地電話用戶流失由1月份190萬減慢至103萬，首兩個月累計流失客戶293萬，用戶總數1.9億。中電訊業績符合市場預期，股價靠穩無起跌，跑贏同業和大市。

沙塵暴炒林業股？
沙塵暴吹到嚟香港，空氣污染勁升，中環茶友靈機一觸，話沙塵暴咁勁，中央唔知會唔會加強植林，林業股有機會炒炒沙塵暴概念喎，信乎？

陸羽仁
上一頁 下一頁


Top Index