青心直說 - 胡孟青 2010年3月23日

青心直說 - 胡孟青 2010年3月23日分享至 Facebook
青心直說：復蘇水尾廣船運轉乾坤

人民幣升值之戰越打越精采，債仔美國越嚟越惡，威脅要將中國列入操控貨幣的「邪惡核心」，國際貨幣基金組織幫口，話全球政府債台高築遲早出事，預計發達國家到 2014年負債會超過國民生產總值 110%。中國最好中門大開，放水幫全世界還債。正當中國處於下風之際，商務部長陳德銘突然話， 3月中國可能會出現貿易逆差，叫美國 4月公佈嘅滙率報告醒醒定定咁寫。中國的數據向來「彈性」十足，如 3月公佈嘅數據真係顯示通脹升溫超過 3%，而外貿放緩至出現逆差，暫時唔好太大驚小怪，因為好有可能係為咗應付美國針對人民幣升值嘅煙霧彈。去年全球貿易跌 22%，中國出口跌 16%，但進口只跌 11.2%，商務部話當中有唔少係奢侈品，其實更大部份係商品原材料。巴西淡水河谷剛剛先要求鐵礦石提價一倍，內地石油煤炭等需求有增無減，令進口繼續強勁。講真，俾人民幣升值，進口原材料負擔可以減輕、工人血汗唔會被嚴重低估、公司盈利有望提升，對經濟有好處。但短線惡果，係資產泡沬可能因貨幣升值而爆破。反映亞洲消費力

大市關鍵唔再係經濟基本因素，而係中美雙方喺人民幣議題上嘅博奕。美國為救經濟，不惜大開印鈔機引發全球通脹，卻希望人仔升值刺激出口，冷不妨中國企硬，美國以死相迫陰乾美元。中國係美國大債主，溫總理都怕資產安全出問題。賭美金跌嘅資金早已流入航空股，令道瓊斯航運指數大幅跑贏大市，亞洲區消費力終於反映喺航運業上，係炒復蘇水尾之選。留意波羅的海指數月中反彈，一度創今年新高，而波的指數往往同美元反向走，相信美金死雞彈完航運股有運行。工信部公佈，今年首兩個月中國新承接船舶定單升近 8倍，今明兩年係交貨高峰期。中海船舶(651)急升後發盈警震番你手貨出嚟，輪到我國最大造船企業廣州廣船(317)發力，公司下周二出業績，頭 9個月營業額已有改善，以佢 7倍市盈率兼近 4厘股息，係中線候低嘅航運股上游首選。胡孟青


Top Index